أنا زيك
(1)
نايمة على سرير من غير ألواح
عطشان لصباح
والميه مش طايله القلة
والزير مكسور ف الحواداية
ومنامى خايف م الحداية
(2)
أنا زيك
أحزانى من جوايا ومن حواليا
ومحاصرة بأشياء بهتانة
وحيطان بتضيق
وبتسقط ويا التعاويذ المدموجة ف أرواحنا
أنا زيك
عمرى بينزف ناره
ونفسى آخذ له بتاره
وأرفرف ويا النورس وألاقى وجودى
وأعيش م الأول ف صباحك
أنا زيك
عايزه أكسر قضبانى لكن مش قادرة
ولا أظلم ولا أكون الجانى
إحساسى تاعبنى وراعبنى وواجعنى حساباته
والحب اللى ف قلبى بيفضل غيرى عن ذاته
أنا زيك
وصبايا الحزنان على حالى
حيفضل بيوحد فيّا مشاعرى بأحزانى
والصوت الصامت ف الشكوى
هو حياتى وهو محطة قدرى
بس قضيب العمر محود
على ناس تانيين ف محطة حظ
(3)
أنا زيك
الصمت إتمكن من صوت قلبي
وعذرية إحساسى وبكارة روحى
حرف الميم بيشق العمر المتوارى ف غيومه
والصاد بعيونها رعدت برق
وفتحت لى تاء التأنيث
قسمتنى ف مغارة اللآم
ولامتنى من كتر الصمت
صوبت الألف المسنونة
كسيف متقاد برعونة تشق الأرض
أتسحب من بين قمشات الندهة
المفروشة على صدر الخوف
غنيوة تتلحن ويا الدم الغاير
ف العمر المشتاق لسعادة
ليست هناك تعليقات:
إرسال تعليق