كان نفسي
كان نفسى أرضيك
وأزحزح خوف الزمن اللاعب بيك
والكاسر حلمك
أتجول ف غموضك
أستثنى غضبك
أتحمل وياك الدنيا
الواثقة من إحساس الوعى
يأتلف الجسر الواصل بيننا
النابع من إصرارنا
بإننا متحدين بينا ما بينهم
كان نفسى
أرجع لك إشراقة ورصانه روحك
وشموخ الكلمة ف حلقك
تتكن ف أول صدق يقابلك
وأشاركك ف مرارة
ظلم الخلق
تتوحد رؤيانا
لضمير الحق الصابر فينا عليهم
كان نفسى
أكون فرسانك وميدانك
فلسفتك وعقيدة أوطانك
وساعات الليل لما بيسكن ف دموعك
كان نفسى
أكون فيك الحاضر
والناهى والآمر
والمتآمر وياك على حزنك
والمتعاهد على صحة أقوالك
وأكون لك منهج أفراحك
تتلفع بيَا أستر أوقاتك
تلمحنى ف حسن النيه
كان نفسى
تروض لى نفسى
تفككنى عن سلطة ما فيَا
تفتح بيبانى
تحصرنى بين أسوارك وحدودك
مسرحنى جوه المستحيل
أنا روحى طير
أحيينى من نفحة حياتك
تبرق إشاراتك خلود
نتهجى إجابات الوجود
يتعافى صوت الأبجدية
تتجدد الرغبة الأكيدة للخضوع
تبتدينى وأبتديك
لكن لسه الأمل الواقف
على أبواب قراراتنا عنيد
بيحول جناحات مسافاتنا بعيد
طايح فينا صراخ اللأ
كان نفسنا يدينا الحق
نبقى لبعض
لكن فرض البُعد أوامر
وبقى الكان ف الغيب
مش آمن
وأنا كان نفسى
كان نفسى أرضيك
وأزحزح خوف الزمن اللاعب بيك
كان نفسى
كان نفسى
ليست هناك تعليقات:
إرسال تعليق