الله يا ثومة
إهداء إلى كوكب الشرق أم كلثوم
الله يا ثومة
يا كوكب الشرق الجميل
نهر فنك سلسبيل
نيلك الغالى الأصيل
لحن أطلال السنين
يا نغم صحى آهات الليل ورود
شوق قلوب عطر الوجود
يا سيمفونيات الدفا
تاخدنا من ويل الجفا
الله يا ثومة
بتصبرينا ع الزمان
تشجينا من سحر الخيال
بتشوقينا للهنا
ويا السكينة والمنى
فى حضن النجاة
طبطبى بالحب على جرح الفراق
وأبدرى أمل اللقا ف طريق عشاق
الله يا ثومة
يا أنشودة نهار
فيها أحلام النجوم
النغم ف الموج يدوب
عود وبيهز القلوب
وتر على الإحساس يدندن
يا أغلى قصيدة حب
شمس باقية فى كل درب
يا قمر بيونس الليل والعيون
يا عبير عطر الربيع المنتظر
الله يا ثومة
ياغنوة قايدة بذكريات
للى جاى واللى فات
يا رومانسية معانى الأغنيات
يا شفافية سمو التنهيدات
يا حلم كل الأمنيات
الله يا ثومة
يا عذوبة رقتك
يا صبية ف ضحكتك
يا عظيمة يا سفيرة
باحترامك وبأدائك
مصر ولاده بفنك
مصر مبهورة بذكائك
يا هرم باقى على مر العصور
يا أمل عايش جسور
جوه أيام الصبا
يا خيوط الفجر بتوحد صفا
ف الانسجام
يا حمام يبدر سلام جوه النفوس
الله يا ثومة
يا ترنيمات الحنان
بتلاغى لحظات الوفا
يا شروق المعجزات
الله يا ثومة ع الهنا
فى حضن آهك
بيصحصح النشوى فى روح المجروحين
ويقرب البهجة ف صدور المشتاقين
يا شفايف النسمة البريئة بتهدى
الوجع
بين الأنين
تتلاقى مسافات الحنين
جوه غربة كل الطيور المجروحين
الله يا ثومة
يا فرحة الوجدان بضيك
والله يا غالية ما شوفنا زيك
كل أول شهر ذكرى حلوة منك
صوتك الرائع هلالك
باقى فينا من جمالك
نبض روحك وانتصارك
الله يا ثومة
يا ملاك النغم
يا شلالات الحب
فى كيان البشر
يا فراشات المشاعر
يا أسطورة صباح
بتحاكى أسرار الزمان
وتناجى خير الكون ف نيل
يا كبرياء النور دليل
على أن فنك سلسبيل
يا كوكب الشرق الجميل
يا كوكب الشرق الجميل
الله يا ثومة
الله يا ثومة
الله ـ الله ـ الله
ليست هناك تعليقات:
إرسال تعليق